पुणे : मध्य प्रदेशातील ऐतिहासिक ग्वाल्हेर शहराच्या रेल्वे स्थानकाचा आराखडा बनवण्याच्या आंतरराष्ट्रीय स्पर्धेत महर्षी स्त्रीशिक्षण संस्थेच्या डॉ. भानूबेन नानावटी कॉलेज ऑफ आर्किटेक्चर फॉर वुमेनच्या (बीएनसीए) तीन विद्यार्थिनीनी प्रथम पुरस्कार पटकावला आहे. ‘बीएनसीए’मध्ये वास्तूरचनाशास्त्राच्या चौथ्या वर्षात शिकत असणार्‍या या विद्यार्थिनींची नावे संजना शिंदे, अलोका काळे आणि सायली गंगण अशी असून, त्यांना यासाठी ८० हजार रुपयांचे बक्षीस भारतीय रेल्वेच्या संकेतस्थळावर नुकतेच जाहीर झाले.
राष्ट्रीय पातळीवरील ग्वाल्हेर रेल्वेस्थानक डिझाइन स्पर्धेत देशभरातून आर्किटेक्ट व्यावसायिक तसेच विद्यार्थी सहभागी झाले होते. या स्पर्धेत ५७ महाविद्यालयांनी सहभाग घेतला होता. ‘बीएनसीए’च्या या विद्यार्थिनींना प्राचार्य डॉ. अनुराग कश्यप, प्राध्यापक वैशाली अनगळ, महेश बांगड, शार्वेय धोंगडे तसेच आर्किटेक्ट चैतन्य पेशवे आणि सोनाली माळवणकर यांनी मार्गदर्शन केले.
‘ग्वाल्हेर रेल्वे स्थानकाचा नवीन आराखडा शहराच्या ऐतिहासिक तसेच सांस्कृतिक व्यक्तिमत्त्वाशी मेळ साधणारा असावा हे आव्हान आमच्या पुढे होते. या स्थानकाचा नवा आराखडा तयार करताना तेथील जुन्या व नवीन वास्तू, तसेच उत्पन्न मिळवून देणार्‍या व्यापारी इमारती, याशिवाय तेथील रहदारीचा प्रश्‍न आणि पादचार्‍यांसाठी वेगळी व्यवस्था करून देताना आम्ही अनेक व्यवहार्य, तसेच तेथील सौंदर्य खुलवणारे बदल सुचवले,’ असे संजना शिंदे हिने सांगितले.
